பங்குச்சந்தை (Stock Market) என்றாலே வெறும் பங்குகளை வாங்கி விற்பது மட்டும்தானா? இல்லை! மணி அண்ணனின் முறுக்கு கடை கதையின் மூலம், ஒரு முதலீட்டாளர் நான்கு வெவ்வேறு வழிகளில் எப்படி லாபம் சம்பாதிக்கலாம் என்பதை இந்தப் பதிவில் விரிவாகப் பார்க்கலாம்.
மணி அண்ணன் தனது முறுக்கு கடையைப் பங்குகளாகப் பிரித்து மக்களிடம் முதலீடு வாங்கியது உங்களுக்கு நினைவிருக்கும். இப்போது அந்த பிசினஸ் சூடுபிடிக்கத் தொடங்கிவிட்டது.
நீங்கள் மணியின் கம்பெனியில் 50 ரூபாய் கொடுத்து ஒரு பங்கு (Share) வாங்கியிருக்கிறீர்கள் என்று வைத்துக்கொள்வோம். இப்போது உங்கள் 50 ரூபாய் எப்படி பல வழிகளில் வளரப்போகிறது? இதோ அந்த 4 ரகசியங்கள்!
முதல் வழி: மூலதன உயர்வு (Capital Appreciation)
“விலை ஏறுது, லாபம் வருது!”
இதுதான் பங்குச்சந்தையில் பெரும்பாலான மக்கள் பணம் சம்பாதிக்கும் முதல் மற்றும் முக்கியமான வழி.
கதை:
மணி அண்ணன் மக்களிடம் வாங்கிய 5 கோடி ரூபாயை வைத்து, அதிநவீன முறுக்கு சுடும் இயந்திரங்களை வாங்கினார். கோயம்புத்தூர், சென்னை, மதுரை என கிளைகளைப் பரப்பினார். இப்போது “மெகா முறுக்கு” ஒரு பிராண்டாக மாறிவிட்டது. ஊர் முழுக்க எங்கு பார்த்தாலும் மணியின் முறுக்குதான்.
ஆரம்பத்தில் நீங்கள் ஒரு பங்கை ₹50-க்கு வாங்கினீர்கள். இப்போது கம்பெனி லாபத்தில் ஓடுவதைப் பார்த்துவிட்டு, அந்தப் பங்குகளை வாங்க இன்னும் ஆயிரம் பேர் வரிசையில் நிற்கிறார்கள். ஆனால் வாங்கியவர்கள் யாரும் விற்கத் தயாராக இல்லை.
விளைவு? நீங்கள் ₹50-க்கு வாங்கிய பங்கின் விலை இப்போது ₹150 ஆக உயர்ந்துவிட்டது.
முதலீட்டாளர் லாபம்:
இங்கே உங்கள் பணம் எதையும் செய்யாமலேயே மூன்றும் மடங்காக உயர்ந்துவிட்டது. நீங்கள் அந்தப் பங்கை விற்றால், உங்களுக்குக் கிடைக்கும் ₹100 லாபம்தான் ‘கேபிடல் அப்ரிசியேஷன்’ (Capital Appreciation).
நிஜ உலக உதாரணம்: சில ஆண்டுகளுக்கு முன்பு ஒரு ரிலையன்ஸ் (Reliance) பங்கினை ₹1000-க்கு வாங்கியிருந்தால், இன்று அதன் விலை ₹2500-க்கு மேல். இந்த விலை உயர்வே உங்கள் முதல் வருமானம்.
இரண்டாம் வழி: லாபப் பங்கு (Dividend Income)
“உழைக்காமலே வரும் ஊதியம்!”
நீங்கள் கம்பெனியின் பங்குகளை விற்க விரும்பவில்லை. “மணி அண்ணன் பிசினஸ் இன்னும் வளரும், நான் ஏன் விற்க வேண்டும்?” என்று நினைக்கிறீர்கள். அப்படியானால் உங்களுக்கு லாபம் கிடைக்காதா? அங்கேயேதான் ‘டிவிடெண்ட்’ வருகிறது.
வருட இறுதியில் கணக்குப் போட்டுப் பார்த்ததில், மணி அண்ணனுக்கு எல்லா செலவுகளும் போக ₹1 கோடி நிகர லாபம் கிடைக்கிறது. மணி யோசிக்கிறார், “இந்த லாபம் எனக்கு மட்டும் சொந்தமல்ல, முதலீடு செய்த மக்களுக்கும் இதில் பங்கு உண்டு.”
அவர் அறிவிக்கிறார்: “ஒரு பங்கு வைத்திருப்பவர்களுக்கு ₹2 லாபப் பங்காக (Dividend) வழங்கப்படும்.”
முதலீட்டாளர் லாபம்:
உங்களிடம் 1,000 பங்குகள் இருக்கிறது என்று வைத்துக்கொள்வோம். நீங்கள் எதுவும் செய்ய வேண்டாம், உங்கள் வங்கிக் கணக்கிற்கு நேராக ₹2,000 (1000 x ₹2) வந்துவிடும். உங்கள் பங்குகள் அப்படியே உங்கள் கையில் இருக்கும், ஆனால் அந்த கம்பெனி சம்பாதிக்கும் லாபத்தில் உங்களுக்குப் பங்கு கிடைத்துக்கொண்டே இருக்கும்.
நிஜ உலக உதாரணம்: டி.சி.எஸ் (TCS) போன்ற நிறுவனங்கள் தங்களுக்குக் கிடைக்கும் லாபத்தில் பெரும் பகுதியைத் தங்கள் பங்குதாரர்களுக்கு டிவிடெண்டாகவே கொடுத்துவிடுவார்கள். இது ஒரு நிலையான வருமானம் போன்றது.
மூன்றாம் வழி: போனஸ் பங்குகள் (Bonus Shares)
“ஒன்று வாங்கினால் ஒன்று இலவசம்!”
இது முதலீட்டாளர்களுக்குக் கிடைக்கும் ஒரு மிகப்பெரிய ஜாக்பாட்.
மணி அண்ணன் கம்பெனி இப்போது மிகப் பெரிய உயரத்தில் இருக்கிறது. கம்பெனியின் கையில் ஏகப்பட்ட உபரிப் பணம் (Reserves) சேர்ந்துவிட்டது. மக்களுக்கு ஏதாவது ஸ்பெஷலாகச் செய்ய வேண்டும் என்று மணி நினைக்கிறார். ஆனால் கையில் இருக்கும் பணத்தை நேரடியாகக் கொடுக்காமல், “போனஸ் பங்குகளை” அறிவிக்கிறார்.
மணி அறிவிப்பு: “1:1 போனஸ்”
அதாவது, ஒரு பங்கு வைத்திருப்பவர்களுக்கு ஒரு பங்கு இலவசம்!
முதலீட்டாளர் லாபம்:
உங்களிடம் ஏற்கனவே 1,000 பங்குகள் இருந்தன. இப்போது மணி அண்ணன் கொடுத்த போனஸ் மூலம் கூடுதலாக 1,000 பங்குகள் உங்கள் கணக்கிற்கு வரும். இதற்காக நீங்கள் ஒரு பைசா கூட செலவு செய்யத் தேவையில்லை.
இப்போது உங்களிடம் மொத்தம் 2,000 பங்குகள் இருக்கும். பங்கின் விலை தற்காலிகமாகச் சற்று குறைந்தாலும், நீண்ட காலத்தில் உங்களிடம் இருக்கும் பங்குகளின் எண்ணிக்கை அதிகரிப்பதால், உங்கள் செல்வம் பல மடங்கு பெருகும்.
நான்காம் வழி: பங்குப் பிரிப்பு (Stock Split) –
“சில்லறையாக மாற்றுதல்”
இது பார்ப்பதற்கு போனஸ் போலவே தெரிந்தாலும், இதன் பின்னணி வேறு.
மணி அண்ணனின் கம்பெனி ஷேர் விலை இப்போது ஒரு பங்கு ₹1,000 என்று எகிறிவிட்டது. ஒரு சாதாரண முறுக்கு கடை தொழிலாளி மணியின் கம்பெனியில் முதலீடு செய்ய நினைக்கிறார். ஆனால் ஒரு ஷேர் ₹1,000 என்பது அவருக்குப் பெரிய சுமை.
புதிதாக முதலீடு செய்பவர்கள் கஷ்டப்படுவதைப் பார்த்த மணி, ஒரு முடிவு எடுக்கிறார். “விலையைக் குறைப்போம், ஆனால் பங்குகளின் எண்ணிக்கையை அதிகரிப்போம்.”
அவர் அறிவிப்பு: “1:10 ஸ்டாக் ஸ்பிளிட்”
அதாவது, ஒரு ₹1,000 மதிப்புள்ள பங்கினை உடைத்து 10 பங்குகளாக மாற்றுகிறார்.
முதலீட்டாளர் லாபம்:
உங்களிடம் 1 பங்கு ₹1,000 விலையில் இருந்தது. இப்போது அது 10 பங்குகளாக மாறும். ஒரு பங்கின் விலை ₹100-ஆகக் குறையும்.
முன்: 1 பங்கு x ₹1000 = ₹1000
பின்: 10 பங்குகள் x ₹100 = ₹1000
“இதில் எனக்கு என்ன லாபம்? மதிப்பு மாறவில்லையே?” என்று நீங்கள் கேட்கலாம்.
உண்மையான லாபம் இங்கேதான் இருக்கிறது: இப்போது விலை ₹100 என்பதால், நிறையப் பேர் அந்தப் பங்கை வாங்க வருவார்கள். டிமாண்ட் கூடும்போது, அந்த ₹100 ஷேர் மீண்டும் ₹200, ₹300 என உயரத் தொடங்கும்.
அப்போது 1 ஷேர் வைத்திருந்தபோது கிடைத்த லாபத்தை விட, 10 ஷேர் வைத்திருக்கும்போது உங்களுக்குக் கிடைக்கும் லாபம் மிக அதிகம்!
ஏன் முதலீடு செய்ய வேண்டும்? (The Power of Compounding)
மணி அண்ணன் கதையில் நீங்கள் பார்த்தது போல, நீங்கள் ஒருமுறை முதலீடு செய்துவிட்டு அமைதியாக இருந்தால், அந்த பிசினஸ் உங்களுக்காக உழைக்கும்.
முதலில் விலை உயர்கிறது (Appreciation).
இடையில் கையில் பணம் கிடைக்கிறது (Dividend).
திடீரெனப் பங்குகள் இரட்டிப்பாகிறது (Bonus).
பிறகு இன்னும் எளிமையாக மாறுகிறது (Split).
இந்த நான்கு சக்திகளும் ஒன்றிணையும்போதுதான், ஒரு சாதாரண முதலீட்டாளர் சில ஆண்டுகளில் கோடீஸ்வரராக மாறுகிறார். ரிலையன்ஸ், விப்ரோ (Wipro), இன்ஃபோசிஸ் போன்ற நிறுவனங்களில் ஆரம்ப காலத்தில் முதலீடு செய்தவர்கள் இன்று பெரும் பணக்காரர்களாக இருப்பதற்கு இந்த 4 காரணங்கள்தான் அடிப்படை.
எச்சரிக்கை மணி!
மணி அண்ணன் முறுக்கு கடை நன்றாக ஓடினால் மட்டுமே இவை அனைத்தும் நடக்கும். ஒருவேளை மணி அண்ணன் தரமில்லாத பொருட்களைப் பயன்படுத்தினால், கடையை மக்கள் புறக்கணிப்பார்கள்.
அப்போது பங்கின் விலை குறையும், டிவிடெண்ட் கிடைக்காது. எனவே, “நல்ல பிசினஸைத் தேர்ந்தெடுப்பது” ஒரு முதலீட்டாளரின் மிக முக்கியமான வேலை.